Mat 4 | NdeIBE | STEP | UJesu waseholwa nguMoya umusa enkangala waselingwa ngumoya omubi.

Matthew 4

Ukulingwa KukaJesu

1 UJesu waseholwa nguMoya umusa enkangala waselingwa ngumoya omubi.

2 Wazila ukudla okwezinsuku ezingamatshumi amane, lobusuku obungamatshumi amane, wacina eselambile kakhulu. 3 Umlingi weza kuye wathi, “Uma uyiNdodana kaNkulunkulu tshela amatshe la abe yisinkwa.”

4 UJesu waphendula wathi, “Kulotshiwe ukuthi: ‘Umuntu kaphili ngesinkwa kuphela, kodwa ngelizwi lonke eliphuma emlonyeni kaNkulunkulu.’ ”

5 Omubi wasemthatha emusa emzini ongcwele wammisa esiqongweni sethempeli.

6 Wathi, “Uma uyiNdodana kaNkulunkulu, ziphosele phansi. Phela kulotshiwe ukuthi: “ ‘Uzayala izingilosi zakhe ngawe, zizakugama ngezandla zazo, ukuze ungatshayeleli unyawo lwakho elitsheni,’ ”

7 UJesu wamphendula wathi, “UMbhalo oNgcwele uthi njalo, ‘Ungayilingi iNkosi uNkulunkulu wakho.’ ”

8 Waphinda njalo omubi wamusa entabeni ephakemeyo kakhulu wamtshengisa yonke imibuso yomhlaba lobukhazikhazi bayo.

9 Wathi, “Ngizakunika konke lokhu aluba nje ungakhothama ungikhonze.”

10 UJesu wathi kuye, “Suka kimi, Sathane! Ngokuba uMbhalo oNgcwele uthi: ‘Khonza iNkosi uNkulunkulu wakho, ukhonze yena yedwa.’ ”

11 Omubi wasemtshiya, izingilosi zeza zamnakekela.

UJesu Uqalisa Ukutshumayela

12 UJesu wathi ukuba ezwe ukuthi uJohane wayesevalelwe entolongweni wabuyela eGalile.

13 Wasuka eNazaretha wayahlala eKhaphenawume, eyayisekhunjini lwechibi emmangweni wakoZebhuluni lakoNafthali,

14 ukugcwalisa lokho okwatshiwo ngomphrofethi u-Isaya ukuthi:

15 “Lizwe lakoZebhuluni njalo lizwe lakoNafthali, indlela eya olwandle, elandela iJodani, Galile yabezizwe –

16 abantu ababehlezi emnyameni sebebone ukukhanya okukhulu; kulabo abahlezi elizweni lethunzi lokufa ukukhanya sekufikile.”

17 Kusukela kulesosikhathi uJesu waqalisa ukutshumayela esithi, “Phendukani ngokuba umbuso wezulu ususondele.”

Ukubizwa Kwabafundi Bokuqala

18 Kwathi uJesu ehamba ekhunjini loLwandle lwaseGalile wabona izelamani ezimbili, uSimoni owayethiwa nguPhethro lomfowabo u-Andreya. Babephosela amambule olwandle ngoba bengabagoli benhlanzi. 19 UJesu wathi, “Wozani lingilandele ngoba ngizalenza abagoli babantu.”

20 Masinyane nje batshiya amambule abo bamlandela.

21 Ehamba esuka lapho wabona ezinye izelamani ezimbili, uJakhobe umfokaZebedi lomfowabo uJohane. Babesesikepeni beloyise uZebedi belungisa amambule abo. UJesu wababiza 22 baphanga batshiya isikepe kanye loyise bamlandela.

UJesu Usilisa Abagulayo

23 UJesu wahamba kulo lonke iGalile efundisa emasinagogeni abo, etshumayela izindaba ezinhle ezombuso, esilisa zonke izifo lemikhuhlane ebantwini. 24 Udumo lwakhe lwanda kulo lonke elaseSiriya, abantu babaletha kuye bonke ababegula belezifo ezahlukeneyo, labo ababesebuhlungwini obukhulu, abaphethwe ngamadimoni, abalesithuthwane labayizilima, bonke wabasilisa.

25 Amaxuku amakhulu evela eGalile, eDekhapholi, eJerusalema, eJudiya lasemmangweni ongaphetsheya kweJodani amlandela.